الاسبوع الاول

فات الاسبوع الاول فى مشوار الريجيم والحمد لله نقصت 2 كيلوجرام وانا شايف انها نسبه كويسه جدا بس يا رب اعرف استمر

انا حطيت لنفسى شوية قواعد و قوانين الزمت نفسى بيهم طول ايام الأسبوع .. اول حاجه انى ابطل اشرب البيبسى و كافة انواع المياه الغازيه خالص لان مالهاش لازمه ..يعنى انا واحد كنت احب اشرب على الاقل ازازتين او تلاته حاجه ساقعه فى اليوم .. وكنت باقول اشربه علشان اروى عطشى وطبعا لما بشرب البيبسى لا كان بيروى عطشى ولاحاجه بالعكس كنت باعطش اكتر فاشترى بيبسى كمان وهكذا

انا بصراحه قررت استبدل المياه الغازيه بكافة انواعها بالمياه فقط..اه بالمياه ولو زنقت قوى يبقى عصائر لكن مفيش بيبسى بعد اليوم 🙂

تانى قاعده هى الاستغناء عن المصعد (الاسانسير يعنى) واستخدام السلم فى الطلوع و النزول

ثالث قاعده بقى انى ابطل اكل اى حاجه بين الوجبات يعنى فطار و غداء وعشاء بس يعنى ميبقاش فيه اكل ما بين الوجبات زى ما كنت باعمل فى الأول دا غير انى فى معظم ايام الأسبوع اللى فات مكنتش بتعشى اصلا يعنى تقريبا هما وجبتين فى اليوم

رابع قاعده هى تقليل كمية الأكل إلى النصف يعنى مثلا بدل ما كنت باكل اربع سندوتشات يبقوا اتنين بس

التزمت بالقواعد والقوانين دى طول الأسبوع باستثناء الخميس اللى هو امس يعنى اللى معتبره الopen day او اليوم المفتوح واللى باكل بقى اللى نفسى فيه بس بكميه معقوله 🙂

نبتدى منين الحكايه

دى اول رساله فى المدونه اللى انا خصصتها زى ما هو واضح من عنوان المدونه علشان الريجيم ..

المدونه بتعرض تجربه شخصيه يعنى لا انا خبير غذائى ولا متخصص انظمه غذائيه ولا دكتور انما انا مجرد واحد overweight شويه وعاوز اقلل وزنى

انا طولى 172 سم تقريبا ووزنى حوالى 88 كيلو جرام .. وهدفى ان يوصل وزنى ان شاء الله ل70 كيلوجرام

بما ان دى اول رساله فانا احب احكى فيها حكايتى مع الدايت او الريجيم يعنى من زمان

انا لحد ما كان عندى 19 سنه كان وزنى فى حدود 74 كيلوجرام و كنت مرتاح جدا لكن بعد انشغالى الشديد فى فترة الجامعه و المذاكره وتقليلى من الرياضه كان وزنى بيزيد لغاية ما وصل الى 90 كجم ..نويت بعد ما خلصت دراسه انى ابتدى ريجيم وبالفعل خسيت 8 كجم لكن فى اقل من شهر زدت تانى وحاولت كذا مره اعمل ريجيم وفى كل مره اضعف فى نصف المشوار وارجع ازيد كل اللى خسيته بل و ازيد كمان لغاية ما وصل وزنى ل97 كجم

ساعتها طبعا نويت انى ابتدى  ريجيم و بعد معاناه و انتكاسات بقى وزنى 88 كجم ووقفت على كده فتره طويله

دلوقت انا شايف انى لازم انزل وزنى لغاية 70كجم لانى لازلت مليان وبدأت من جديد مشوار الريجيم واتمنى من ربنا انه يعدى على خير من غير انتكاسات